Foto: pexels
Liebi Läserinne u Läser
Es isch auso Wöschtag gsi u das – dass chöiter mr gloube! – isch immer ä koordinatorischi Höchstleistig. Imne Huus mit meh Parteie aus Wuchetäg u nume eire Wöschmaschine, isch scho dr Wöschplan uszklügle an sich ä rächti Useforderig. Het me de Wöschtag, de empfiuts sech, dr Timer zsteue, für müglechst ziitnach di nächsti Wösch chönne überztue, das me do o düre ma, bevor di nächsti Partei dran isch. Drzue chunnt ä relativ chline Wöschruum, wo dWösch im Winter o nach 24 Stung nid troche isch – im Summer chame se zmingst dusse häiche, was di ganzi Sach definitiv entspannt.
I üsem Fau chöme zwöi witeri erschwärdeni Faktore drzue: besagtes Chliching u dass mir im oberste Stocke wohne u di Wöschmaschine natürlech im Chäuer steit. Das bedütet, Wösch samt Sack u Pack aui Stägene achetrage inklusive Ching – u wehe me vergisst öpis. Z.B. dWöschcharte. Nä genau überlege, wi mängi Mühli Wösch me mindestens scho muess mit ache nä, u weli me zersch wöschet. Wüu wes eini isch, wome cha i Tumbler gheie, de isch das aschliessend ä bedütende Ziitufwandungerschied zu eire, wome muess häiche. Glichziitig müesse die Sache, wo am schlechtiste tröchne müglechst früech gwöschet wärde, dass si so lang wi müglech i däm Ruum chöi hange, wo dWösch ja nä am Schluss glich nid troche isch. U au die Überlegige müess no ufe Tagesrhythmus vom Ching abstimmt wärde. Wüu irgendwenn isch ja z.B. o no Ziit füre zÄsse oder füre Mittagsschlaf. U da das Ching im Bsitz vor ungloubleche Superchraft isch, o im Schlaf no sofort zmerke, wemes nume churz allei laht u i Chäuer geit – muess di nächsti Wösch bis nach däm Schläfli warte, was di müglechi Wöschziit no mau verchürzt.
A däm Wöschtag, woni nech drvo wet vrzeue, isch dr Ziitdruck bsungers gross gsi, wüu dWöschmaschine ersch abem Mittag frei isch gsi. Auso nume ä haube Tag Ziit füre Wöschbärg taktet suber zübercho u ersch no i dere Tagesheufti, wo o no dr Mittagsschlaf stattfingt. Heisst: mis Stresslevel isch ziemlech wiit entfernt vo yoga-töifeentspannt gsi.
Es isch scho öpe haubi 5i am Abe gsi u i ha zZiitfäister bis di aktuelli Müliwösch isch fertig gsi, wöue nutze, für no gschwing ga di letsche Sache zkömmerle für Znacht. Natürlech het zChing lieber wöue säuber loufe aus i Wage zhocke – wis überhoupt immer aus am liebste säuber würd mache – u i sägenechs, jedi Wägstrecki duuret miteme Chlinching ungloge locker 10 mau lenger aus ohni. Mir si auso los, i scho 10 Meter vorus im Stächschritt, da luegeni zrugg u gseh, wi zChing am Bandeli steit u Blüemli beguetachet u dran schmöckt. Strahlend luegts mi a u rüeft «Muetti» u bedütet mr, i söu o cho schmöcke. I reagiere irgendwo zwüsche chli verzwiflet u unghaute: «Chani dran schmöcke, wemer ume heich chöme u kömmerlet hei?» U i däm Momänt, woni das sägä, merkeni säuber wie dumm dass das isch, wasi da grad gseit ha. Würklech? Hani nid mau drei Sekunde Ziit für amne Blüemli zschmöcke? Isch das so ne ungloublechi Ungerbrächig im Fahrplan, dass das uf ke Fau Platz het?
Mis Ching isch voreme gäublüchtige Osterglöggil gstange – u mir isch plötzlech klar worde, aus um üs zügt grad vo Ostere. Vor Uferstehig. Drvo, wi Läbe nöi erwachet, nöi wird, lüchtigs Läbe vouer Rueh u Fridä. Nume gsehni das gar nid. Wüu amne Wöschtag hani ke Ziit für dUferstehig. Hani mr ömu igredt. I bi nes Besseren belehrt worde. U wüsster was? Es het gschmöckt nach Rettig u Glückseeligkeit.
Olivia Raval